6 - 7 мая ў літоўскім горадзе Укмерге (Вілкамір) адбылася першая міжнародная канферэнцыя “Сучаснасць з’яўляецца гісторыяй. Чым спадчына Касакоўскіх ёсць у сучаснай Еўропе?” Як гаворыць сама за сябе назва, галоўная тэма канферэнцыі была прысвечана роду Касакоўскіх. Само мерапрыемства было арганізавана самакіраваннем Укмергскага раёна, Укмергскім краязнаўчым музеем і Фондам Касакоўскага (Варшава). Удзел у канферэнцыі прымалі даследчыкі з Польшы, Літвы, Беларусі, Вялікабрытаніі і Францыі.
Адкрыццё канферэнцыі прайшло на высокім узроўні. Уступным словам удзельнікаў вітала патрон форуму, старшыня парламента Літоўскай Рэспублікі Ларэта Граужынене. Яна адзначыла, што Касакоўскія займалі значнае месца ў гісторыі палітычнага і культурнага жыцця Літвы, а паглыбленне ведаў і памяці аб славутым родзе дазволіць заглянуць у мінулае і адчуць, наколькі важныя і цікавыя культурныя набыткі Касакоўскіх для будучых пакаленняў. З боку Беларусі былі прадстаўнікі Дзяржаўнай Установы Культуры “Музей Вавёркі ў Вялікай Бераставіцы” – галоўны захавальнік фондаў музея і краязнаўцы Мікалай Парасятнікаў і Сяргей Лушчык. Тэмы дакладаў краналі размаітых пытанняў аб музейных зборах і памяці жыхароў Бераставіцы, архіўных матэрыялах аб маёнтках і сям’і, прыватных зборах кніг, якія захоўваюцца ў Нацыянальнай бібліятэцы Літвы.
Адной з кульмінацыйных падзей канферэнцыі стала падпісанне дамоўленасці аб супрацоўніцтве паміж музеем у Вялікай Бераставіцы і Фондам Касакоўскага, прадстаўніком лічбавага архіва Вайткушкі Анірай Воян.
На другі дзень удзельнікі мерапрыемства наведалі касцёл св. Барбары фундацыі Касакоўскіх, у якім была праведзена імша на лацінскай мове за ўсіх прадстаўнікоў славутага роду, а таксама ўсіх прысутных. Пасля набажэнства наведалі могілкі, дзе пахаваны адзін з уладальнікаў бераставіцкага маёнтка Станіслаў Казімір Касакоўскі. Завяршэнне праграммы адбылося ля рэштак палаца маёнтка Вайткушкі.
Па матэрыялах дакладаў канферэнцыіі Архівам парламента Літвы рыхтуецца да выдання зборнік артыкулаў.
Супрацоўніцтва з Фондам Кассакоўскіх мае перспектыўны характар дзейнасці для музея ў Вялікай Бераставіцы, для нас адчыняюцца шырокія магчымасці, перш за усё інфармацыйны абмен, які запоўніць шмат белых плямаў з гісторыі роду Кассакоўскіх і маёнтка Вялікая Бераставіца.