Ішла вайна народная…
Так называецца чарговая выстава, якая экспануецца ў файе Музея Вавёркі ў Вялікай Бераставіцы. Экспазіцыя пачынаецца з 10-ці графічных партрэтаў праслаўленых франтавікоў і партызан работы мясцовага мастака М.У. Жлабовіча. Сярод іх партрэты камандзіра роты партызанскага атрада “Звязда”, сакратара былога падпольнага Крынкаўскага райкама камсамола М.В. Шышкіна, партызанкі атрада “За Радзіму” Н.І. Катлінскай, удзельнікаў абароны Сталінграда Г.Л. Лазаровіч, У.М. Лосева і іншых. Далей – фотаздымкі не вярнуўшыхся з фронту нашых землякоў.
На выставачных паліцах – лісты з фронту бераставічан, іх юбілейныя ўзнагароды, кнігі і брашуры аб іх франтавых подзвігах, рэшткі ваеннага рыштунку. Сярод іх – салдацкая каска, гільзы ад патронаў і снарадаў, частка прапелера савецкага самалёта, які базіраваўся на эрадроме ў Кватарах, і 22-га чэрвеня 1941 года прыняў бой з фашысцкімі самалётамі і быў збіты ў няроўным баі.